03.11.06 Iarann Ó Cuív Tuairimí Bhord Údarás na Gaeltachta ar Fhorbairt na Gaeilge agus na Gaeltachta
Ag labhairt le Bord Údarás na Gaeltachta i nDoire inniu, d’iarr an tAire Gnóthaí Pobail, Tuaithe agus Gaeltachta Éamon Ó Cuív T.D. tuairimí Bhord Údarás na Gaeltachta ar ábhair ar leith a bhaineann le forbairt na Gaeilge agus na Gaeltachta.
Thug an tAire liosta de cheisteanna sonracha don Bhord mar ábhar machnaimh agus díospóireachta dóibh;
- An bhfuil gá go n-aithneodh an reachtaíocht nua (atá á dhréachtadh maidir le cumhachtaí agus feidhmeanna an Údaráis) gurb é príomhról an Údaráis anois ná pobail láidre bhríomhara labhartha Gaeilge a chothú sa Ghaeltacht?
- Cad é an coibhneas ar cheart a bheith ann idir ról cultúrtha, sóisialta, eacnamaíoch agus oideachasúil an Údaráis agus a ról maidir le forbairt tionsclaíoch?
- Ar cheart go mbeadh struchtúr comhtháite in áit d’oideachas dara leibhéal sa Ghaeltacht?
- Ar cheart go mbeadh an tUdarás ag díriú ar thionscal teanga-lárnaithe amháin i gceantair ar imeall na Gaillimhe agus i ngaireacht do Bhaile Átha Cliath (áiteanna a bhfuil geall le lánfhostaíocht cheana iontu) agus an bhéim a chur ar thionscal ginearálta sna ceantair tearcfhorbartha amháin?
- Maidir le cúrsaí pleanála, ar cheart go mbeadh rialacháin ar leith leagtha síos ag an Aire Comhshaoil nó ar cheart saoirse a thabhairt do na hÚdaráis Áitiúla polasaithe ar leith a oireann dá gcúinsí féin a fhorbairt laistigh d’fhorálacha an Acht Pleanála agus Forbartha?
- Ar chóir go dtiocfadh na heagrais phobalbhunaithe ar fad atá lonnaithe go hiomlán sa Ghaeltacht faoi scáth an Údaráis?
- Cén ceangal ar cheart a bheith idir an tÚdarás agus an phairtnéireacht– comhlacht forbartha tuaithe nua sa Ghaeltacht agus an ceann ar na hoileáin?
- Ar cheart feidhm reachtúil a thabhairt don Údarás i ndáil le hoileáin nach bhfuil sa Ghaeltacht?
- Ar cheart feidhm reachtúil a thabhairt don Údarás i leith cur chun cinn gnóthaí a bhaineann leis an nGaeilge taobh amuigh den Ghaeltacht?
- An bhfuil gá le hAcht na dTeangacha Oifigiúla a leasú maidir le logainmneacha?
- Ar cheart go mbeadh ceantar Gaeltachta chathair na Gaillimhe i limistéar Údarás na Gaeltachta ó tharla go bhfuil na cúraimí tionsclaíochta sa chathair faoi Enterprise Ireland agus an IDA?
Dúirt an tAire nach bhfuil sé ag súil le freagraí inniu, ach gur mhaith leis tuairim an Bhoird a fháil ar na ceisteanna sonracha sin agus aon ábhar eile ar mian leo a ardú as seo go ceann dhá mhí.
Fri, 03 Nov 2006 00:00:22 GMT